Toysdaily 玩具日報

 找回密碼
 註冊
查看: 7161|回復: 1

[公共車] 佳牌紅蕃頭與中巴走在港島的日子 (長文, 多圖注意)

[複製鏈接] |關注本帖
發表於 21-12-2018 16:00:39 | 顯示全部樓層 |閱讀模式


(麻帆良市時報記者キズナアイ報導)
はい、ども! キズナアイです~♥
喺香港, 一提到 Guy 或者 "佳牌" 呢個巴士品牌, 年資較深嘅巴士迷或者巴士業者,
一定會即時聯想起當年中華汽車有限公司, 或者中巴喺港島區服務嘅日子,
事實上, 中巴喺 1950 年代開始, 就已經成為英國佳牌車廠嘅忠實客户,
亦成為佳牌車廠最重要嘅海外客户之一,
最高峰時期中巴共有多達數百部 "佳牌" 巴士喺路上行走, 或者可以咁講,
中巴喺 1950 年代開始巴士服務嘅發展, 都同 "佳牌" 有著不可分割嘅關係。
喺中巴嘅 "佳牌" 巴士車隊之中, 最多資多采嘅,
要數 "佳牌" 亞拉伯五型 (Guy Arab V) 呢款巴士啦,
佢除左係中巴嘅主力車款之外, 亦可以話係中巴嘅運財童子,
款式更加係千變萬化, 除左有長陣短陣之外, 亦有單層雙層,
而且仲有由單層改建成雙層添, 唔單只咁呀,
當年一批為數四十部俗稱 "長龍" 嘅 36 呎長陣版本嘅 "佳牌" 亞拉伯五型單層巴士,
更喺中巴嘅親自操刀之下, 全數 "劈短" 成為 30 呎長嘅底盤,
再配上雙層巴士車身, 成為一架正正式式嘅雙層巴士喺路上接載乘客,
堪稱鬼斧神工。有唔少巴士後來再接受重建車身工程,
由原本樣子古老嘅英國 Metal Section, 來自英國嘅二手巴士車身,
以至中巴自家設計嘅黃洲車身, 脫胎換骨換上由蘇格蘭 Walter Alexander 提供嘅全新車身,
成為後來嘅 LX "假寶", 延續佢地嘅生命力, 並且一走就走到九十年代,
部份巴士服役左達三十年之長, 依然老當益壯。
但係隨住中巴嘅路線喺後期被削減, 中巴喺港島嘅版圖亦漸漸萎縮,
令中巴出現車隊過剩, 一啲車齡較高嘅巴士亦因此而被淘汰,
連 "假寶" 亦不能倖免, 最後一部 "假寶" 巴士, 亦於 1997 年 3 月底退役。

原本以單層巴士車隊為主力嘅中巴,
為左應付當時人口增長所帶來嘅公共交通需求嘅增加,
加上中巴喺 1962 年引入港島首架雙層巴士 -- Dennis Loline III 嘅經驗,
於是喺 1963 年開始, 集中購買雙層巴士,
本文主角嘅呢架中巴 "佳牌" 亞拉伯五型雙層巴士就係其中之一,
呢架車牌號碼 AC4795 嘅 "佳牌" 亞拉伯五型雙層巴士,
真車底盤係原裝地道嘅 30 呎標準長度版本,
而佢嘅雙層巴士車身就由英國 Metal Section 提供, 並且喺香港由中巴負責裝嵌,
喺 1966 年投入服務, 當時原本配上 Gardner 6LW 引擎,
後來被編號為 LW86 ("L"ong wheelbase Gardner 6L"W" 嘅意思),
到左 1972 年被換上馬力較強嘅 Gardner 6LX 引擎, 以應付港島區山路多嘅路面環境,
並且被改編為 LX40 ("L"ong wheelbase Gardner 6L"X")。
佢喺經歷達十多年嘅服務生涯之後, 接受重建車身嘅 "手術",
原本一身 Metal Section 車身嘅裝束,
搖身一變換上當時富有流線線條嘅 Walter Alexander 車身,
而且連車牌亦由原來首次登記嘅 AC4795,
喺 1981 年重新登記新車牌成為 CR1032,
車隊編號亦由 LX40 改為 LX317, 經過重建車身之後,
呢架巴士再次煥發青春, 延續佢嘅生命力,
一直再服役多長達十多年, 直至 1990 年代先至正式功成身退,
前後一共喺中巴服役左長達超過 20 多個年頭!!

今日, 麻帆良市正式歡迎中巴 "佳牌" 亞拉伯五型 "紅蕃頭" 雙層巴士登場!!
呢款曾經叱咤港島超過三十多年嘅雙層巴士車款,
市長 Super Bus 話, 相比起暗紅色車身嘅中巴 "紅蕃頭",
佢嘅印象始終唔及佢以前見到嘅 LX "假寶" 咁深,
始終果陣佢都仲未出世, 試問邊有可能見到呢款巴士新落地果陣嘅蘆山真面目呢?
後來睇到一啲巴士書同車主雜誌嘅巴士迷專欄介紹,
先至見識到呢款巴士以前新落地果陣嘅真面目。
而講到 Super Bus 對呢款巴士印象最深刻,
莫過於佢地重建新車身之後嘅樣子啦,
Super Bus 話, 雖然佢本身係 "九龍人", 但係有時亦會過對面海,
佢話由於當時仲細個, 而且對巴士認識太淺, 當時見到呢啲巴士,
仲以為係新車, 而且車身線條同同樣配上 Alexander 車身嘅勝利二型實在太相似,
混淆左以為係同一款車, 只係頭轆比勝利二型移前左,
後來大個左, 再睇啲巴士書, 先至知原來呢批巴士其實係 1960 年代嘅產物,
由 Guy, 或者 "佳牌" 出品嘅亞拉伯五型, 而且當時由於佢地車頭嘅水箱位頂部,
有一個紅蕃頭像嘅標誌, 因而得名 "紅蕃頭", 而佢一身酷似勝利二型嘅車身,
其實係重建車身而成為呢個樣子, 但係感覺亦非常特別,
同對岸九巴嘅 Daimler E 長牛呢啲車比較, 中巴嘅 "假寶" 尤其特別得多。
Super Bus 仲話, 呢啲 "假寶" 巴士佢當時都坐過好幾次,
由坐 47 號由西環入華富, 以至坐 14 號由赤柱出筲箕灣,
都可以睇得出呢啲巴士嘅靈活性, 再加上當時中巴嘅司機大佬幾乎個個都係 "車神",
更令呢啲 "假寶" 嘅行車表現發揮得淋漓盡致。不過令 Super Bus 印象最深刻嘅,
要算係一次喺 1991 年搭 70 號坐中 "假寶", 由中環入香港仔,
以佢當時已經有廿多年車齡, 依然可以喺香港仔隧道健步如飛!
中巴嘅 Keep 車技術有幾到家由此可見一班, 可惜呢啲 "假寶" 隨住中巴嘅路線被削減,
所引致嘅車隊過剩, 再加上車齡高而被淘汰, 最後亦一架不留,
到 1998 年中巴更喪失專營權, 亦為中巴服務港島區嘅日子劃上句號,
昔日中巴 "假寶" 喺路上飛馳嘅情景, 以至中巴當年喺港島區服務嘅日子,
今日只有喺一啲巴士書嘅相片, 以前影低嘅巴士相片,
以至腦海中嘅回憶去懷愐啦。而今日新到埗嘅呢架中巴 "紅蕃頭" 巴士,
雖然樣子古老但係亦係香港嘅經典巴士車款巴士之一,
配上由 1970 年代起使用嘅上奶黃下橙紅色車身色彩,
陪伴中巴一起走過輝煌嘅七十年代
亦令一眾老一輩嘅 "老香港" 同現在嘅年輕一代,
有機會去懷愐下佢地喺港島服務的流金歲月。

隆重歡迎! 中巴「佳牌」亞拉伯五型 "紅蕃頭" 雙層巴士, LX40, 見參!!









證書編號 0073, 限量生產 400 部


正式落地!!




















與㰴新落地仕樣中巴紅蕃頭相會




來一個對比








最欣賞就係佢 Half-cab detail 上嘅改動






我們一家都是 "佳"






加劣景~





Thanks for reading~


發表於 30-12-2018 23:18:03 | 顯示全部樓層
Thanks for sharing
您需要登錄後才可以回帖 登錄 | 註冊

本版積分規則

Archiver|手機版|Toysdaily 玩具日報

GMT+8, 11-12-2019 05:22 PM , Processed in 0.016390 second(s), 18 queries .

Powered by Discuz! X3.2

© 2001-2013 Comsenz Inc.

討論區聲明:本討論區是以即時上載留言的方式運作,Toysdaily玩具日報討論區對所有留言的真實性、完整性及立場等,不負任何法律責任。而一切留言之言論只代表 留言者個人意見,並非本網站之立場,用戶不完全信賴內容,並應自行判斷內容之真實性。於有關情形下,用戶應尋求專業意見(如涉及醫療、法律或投資等問題)。由於本討論區受到「即時上載留言」運作方式所規限,故能完全監察所有留言,若讀者發現有留言出現問題,請聯絡我們。Toysdaily玩具日報討論 區有權刪除任何留言及拒絕任何人士上載留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一 切法律權利。

快速回復 返回頂部 返回列表